ပြည်မြို့တွင် ဇွန်လပထမပတ်၌ မြို့မစည်ပင်သာယာဈေးကြီးနှင့် အခြားဈေးများတွင် ဖားသား (အစို) မီးကင်ထားသည့် ဖားမျိုးစုံ ရောင်းချလျက်ရှိပါသည်။ တွင်းအောင်စာများတွင် တစ်ခုအပါအဝင် ဖြစ်သည့် ဖားသည် အခါးလည်းမဟုတ် အချိုလည်းမဟုတ်၊ အဆီများသော ပထဝီဓာတ်နှင့်လေပွစေ သော ဝါယောဓာတ်ပျက် ပေါင်းစပ်ထားသော အစာတစ်မျိုးဖြစ်ပါသည်။ ယခုလို မိုးဦးကျကာလတွင် လယ်များထဲမှရရှိသော ဖားမျိုးစုံကို ဈေးကွက်ထဲတွင် လှိုင်လှိုင်ရောင်းချလျက်ရှိပြီး အရောင်းအဝယ် လည်း ဖြစ်ကြပါသည်။ ယခုနောက်ပိုင်းတွင် ဖားကို တစ်နိုင်တစ်ပိုင် စီးပွားဖြစ် မွေးမြူလာသောသူများ များပြားလာပြီး ဖားသားပေါက်များကိုဝယ်ယူပြီး ကန်များဖြင့် တစ်နိုင်တစ်ပိုင် မွေးမြူကြပါသည်။ ဖားသားပေါက်များကို ရန်ကုန်တိုင်း၊ သုံးခွမြို့နယ်၊ ကဒပ္ပနကျေးရွာတို့တွင် ကန်များဖြင့် မွေးမြူကြပြီး ဈေးကွက်ရှိသဖြင့် ဖားအကောင်ကြီးများကို နယ်စပ်အထိ တင်ပို့ရောင်းချကြောင်း သိရှိရပါသည်။ အိမ်ရှင်မများအနေဖြင့် ဖားများကို ဗမာပင်စိမ်းနိုင်နိုင်ဖြင့် အညာချက် ချက်ကြသလို၊ စားသောက်ဆိုင် များကလည်း တရုတ်စတိုင်၊ ဗမာချက်စသည့် နည်းမျိုးစုံ ချက်ပြုတ်ရောင်းချသဖြင့် ဖားမှာဈေးကွက် ရှိသော အစားအစာတစ်မျိုးလည်းဖြစ်ပါသည်။ ဖားမျိုးစုံကို ပြည်မြို့အနီးတစ်ဝှိက်ရှိ ကျေးရွာများနှင့် အခြားမြို့နယ်များမှ ဖားစို (ဖားမီးကင်) များကို ပြည်မြို့ မြို့မစည်ပင်သာယာဈေးကြီးနှင့် အခြားဈေးများ တွင် ကိုယ်တိုင်လာရောက်ရောင်းချသူများရှိသလို တစ်ဆင့်ခံအသည်များဖြင့် ရောင်းချကြပါသည်။ ပြည်မြို့ရှိ ဈေးများတွင် ဖားအိုင်း၊ ဖားပေါင်ရှည်၊ သဲဖား၊ ကျော်ဇံကွေးအစရှိသော ဖားများကို ပေါ်ဦး ပေါ်ဖျား၌ တစ်ဆယ်သားလျှင် ကျပ် (၇၀၀၀) ရှိသော်လည်း ယခုဇွန်လပထမပတ်၌ ဖားများပေါ်များလာ သဖြင့် ဖားပေါင်ရှည် တစ်ဆယ်သားလျှင် ကျပ် (၃၀၀၀)၊ သဲဖားတစ်ဆယ်သားလျှင် ကျပ် (၄၀၀၀)နှင့် ကျော်ဇံကွေးဖားတစ်ဆယ်သားလျှင် ကျပ် (၃၀၀၀) တို့အရောင်းအဝယ်ဖြစ်ကြောင်း သိရှိရပါသည်။

Source:   https://www.doca.gov.mm/