ဧရာဝတီတို်ငးဒေသကြီး ဓနုဖြူမြို့နယ်အတွင်းမှ ရန်ကုန်ဈေးကွက်သို့ ပြီးခဲ့သည့်ဖေဖော်ဝါရီလအတွင်းက ရက် ၉၀ ဆန် ၂၄ ပြည်ဝင်အိတ်ရေ အများအပြားတင်ပို့ရောင်းချနိုင်ခဲ့ကြောင်း ဓနုဖြူမြို့နယ် ဆန်၊ စပါးရောင်းဝယ်ရေးပွဲရုံပိုင်ရှင် ဒေါ်မိုးမိုးက ပြောပြသည်။ ဓနုဖြူမြို့နယ်မှ ရန်ကုန်ဈေးကွက်သို့ ယခုနှစ် ဇန်နဝါရီလအတွင်းက ရက် ၉၀ ဆန် ၂၄ ပြည်ဝင် အိတ်ရေ ၄၅၀၀၀ ထိသာ တင်ပို့ရောင်းချနိုင်ခဲ့ပြီး ပြီးခဲ့သည့်ဖေဖော်ဝါရီလ ၁ ရက်နေ့မှ ၂၈ ရက်နေ့ထိ တစ်လအတွင်း ရက် ၉၀ ဆန် ၂၄ ပြည်ဝင် အိတ်ရေ ၆၇၀၀၀ ထိ တင်ပို့ရောင်းချနိုင်ခဲ့ကြောင်း သိရသည်။ “ ပြီးခဲ့တဲ့ ဖေဖော်ဝါရီလထဲမှာ ဓနုဖြူမြို့နယ်ကနေ ရန်ကုန်ဈေးကွက်ကို ရက် ၉၀ ဆန် အိတ်ရေ ၆၇၀၀၀ ထိ တင်ပို့ရောင်းချခဲ့ရပါတယ်။ လက်ရှိမှာလဲ ရက် ၉၀ ဆန်တွေ အဝယ်များပြီး အရင်ကထက် ပိုမိုတင်ပို့ရောင်းချနေရပါတယ်။ ရန်ကုန်ဘက်ကို ကုန်ပစ္စည်းတွေ များများတင်ပို့ရောင်းချအားရှိလာပေမဲ့ ဆန်ဈေးက ငြိမ်နေပါတယ်။ ဓနုဖြူမြို့နယ်ကနေ ပြီးခဲ့တဲ့တစ်လအတွင်း ရက် ၉၀ ဆန်တွေကို ရန်ကုန်ဈေးကွက်ဘက်က အဓိကဝယ်ယူအားများခဲ့ပါတယ်” ဟု ဒေါ်မိုးမိုးက ပြောပြသည်။ ဓနုဖြူမြို့နယ်တွင် ရက် ၉၀ ဆန်များကို စနစ်တကျထုပ်ပိုး၍ ရန်ကုန်ဈေးကွက်သို့ တင်ပို့ရောင်းချနေကြောင်း၊ အဆိုပါ ရက် ၉၀ ဆန် တစ်အိတ်လျှင် ငွေကျပ် ၁၁၀၀၀၀ ထိ ပေါက်ဈေးရှိနေပြီး ဆန်များဝယ်လိုအားကောင်းလာသည့်အတွက် ကုန်သည်များ၊ ပွဲရုံပိုင်ရှင်များ၊ ကုန်တင်ယာဉ် အငှားလိုက်သူများ အလုပ်အကိုင်အခွင့်အလမ်း ရရှိအဆင်ပြေလျက်ရှိကြောင်း သိရသည်။
Source: ရတနာပုံသတင်းစာ
