ဗီယက်နမ်နိုင်ငံ၌ မဲခေါင်မြစ်ဝကျွန်းပေါ်ဒေသတွင် စိုက်ပျိုးထားသော သရက်သီးများသည် စူပါမားကတ်များနှင့် ပို့ကုန်ဈေးကွက်များတွင် ဝယ်လိုအားများသည့်အပြင် ရာသီဥတုဖောက်ပြန်မှုကြောင့် ရောင်းလိုအားနည်းပါးလာသည့်အတွက် ဈေးနှုန်းများ မြင့်တက်လျက်ရှိကြောင်း သိရှိရသည်။ ဗီယက်နမ်သရက်သီးဈေးနှုန်းများသည် ယခင်နှစ်ကထက် ၂၀% ဈေးတက်ခဲ့ပြီး သုံးရောင်ခြယ်သရက်သီးတစ်ကီလိုလျှင် ဗီယက်နမ်‌ဒေါင် ၁၅၀၀၀ (အမေရိကန်ဒေါ်လာ ၀.၆) နှင့် Hoa Loc သရက်သီး တစ်ကီလိုလျှင် ဗီယက်နမ်ဒေါင် ၃၀၀၀၀ မှ ၃၃၀၀၀ အထိရှိကြောင်း An Giang ပြည်နယ်ရှိ သရက်စိုက်တောင်သူတစ်ဦးဖြစ်သူ Hoang က ပြောကြားခဲ့သည်။

ထူးခြား၍ ပူပြင်းသည့် ရာသီဥတုကြောင့် သရက်ခြံ တစ်ဟက်တာ၏ သရက်သီး အထွက်နှုန်းသည် ယခင်ထက် ယခုနှစ်အထွက်နှုန်းမှာ ၃၀% လျော့နည်းသော်လည်း စိုက်ပျိုးသူများအတွက် အမြတ်ငွေ ဗီယက်နမ်ဒေါင် သန်း ၈၀ မှ သန်း ၁၂၀ အထိ ဝင်ငွေရရှိနေကြောင်း သိရှိရသည်။ အဝါရောင်ရှိသော Cat Chu ဟု အမည်ခေါ်ဆိုသည့် သရက်သီးများအား ဗီယက်နမ်ရှိ စူပါမားကတ်များနှင့် အမေရိကန်နှင့် နယူးဇီလန်ကဲ့သို့ နိုင်ငံများတွင် နှစ်သက်သဘောကျကြောင်း Dong Thap ပြည်နယ်မှ လယ်သမားတစ်ဦးဖြစ်သူ Thang က ပြောကြားခဲ့သည်။ အဆိုပါ သရက်သီး အမျိုးအစားသည် သေးငယ်၍ချိုပြီး အခြားသရက်သီး အမျိုးအစားများကဲ့သို့ အမျှင်မပါသည့်အတွက် စားသုံးသူများအကြားတွင် လူကြိုက်များသော သရက်သီးဖြစ်ကြောင်း သိရှိရ သည်။

သီးနှံများသည် ရိုးရာဈေးများတွင် ရောင်းချခြင်းထက် စူပါမားကက်များတွင် ဈေးပိုမို ရရှိသောကြောင့် ယခုနှစ်၏ မတ်လမှ ဇွန်လအထိ သီးနှံများသည် အမြတ်အစွန်းများစွာ ရရှိခဲ့ကြောင်း၊ ပျမ်းမျှအားဖြင့် သစ်သီးဝလံအသင်း အဖွဲ့ဝင်များသည် တစ်ကီလိုဂရမ်လျှင် ဗီယက်နမ် ဒေါင် ၂၀၀၀ မှ ၄၀၀၀ ကြား အမြတ်ငွေရရှိခဲ့ကြောင်း သရက်သီးစိုက်ပျိုးသော အိမ်ထောင်စု ၆၀၀ ရှိသည့် An Giang ပြည်နယ်ရှိ သစ်သီးဝလံအသင်း (GAP Cho Moi Fruit Cooperative) မှ ဒါရိုက်တာဖြစ်သူ Tran Quang Truong An က ပြောကြားခဲ့သည်။

ယခုနှစ်တွင် တန်းမြင့်သရက်သီးများ၏ စျေးနှုန်းများမှာ မြင့်တက်လျက်ရှိပြီး ဈေးငြိမ်လျက်ရှိသဖြင့် ပြည်ပတင်ပို့ခြင်းအပြင် ပြည်တွင်းရှိ စူပါမားကတ်များတွင်လည်း အရောင်းမြှင့်တင်လျက်ရှိကြောင်း၊ ယင်းသရက်သီးများသည် ဆိုင်ငယ်များတွင်ကဲ့သို့ ဈေးနှုန်းမတည်ငြိမ်မှုဖြစ်ပေါ်ခြင်း မရှိကြောင်း၊ သရက်သီးများအား မတ်လအစောပိုင်းတွင် စတင်ရောင်းချခဲ့ပြီး အချို့သော စူပါ မားကတ်များတွင် ဝယ်လိုအားများပြားလျက်ရှိကြောင်း Tran Quang Truong An က ဆက်လက်ပြောကြားခဲ့သည်။

ဗီယက်နမ်သရက်သီးများသည် ဈေးသက်သာသောကြောင့် ကမ္ဘောဒီးယားနှင့် ထိုင်းနိုင်ငံတို့မှ တင်သွင်းသည့် သရက်သီးများထက် ဝယ်လိုအားမြင့်မားလျက်ရှိကြောင်း၊ Central Retail Group မှ ဆက်သွယ်ရေးဒါရိုက်တာ Nguyen Thi Bich Van က ပြည်တွင်း၌ ရောင်းချသော သရက်သီးများသည် အမေရိကန်နှင့် သြစတြေးလျတို့မှ တင်သွင်းရန် သတ်မှတ်ထားသော အရည် အသွေးစံနှုန်းများနှင့် ကိုက်ညီကြောင်း ပြောကြားခဲ့သည်။

ဝယ်လိုအားမြှင့်တင်ရန်အတွက် Central Retail Group ပိုင်ဆိုင်သော စူပါမားကတ်များ တွင် သရက်သီးများအား ၄၀% အထိ လျှော့စျေးများ ပေးလျက်ရှိကြောင်း၊ အချို့ဆိုင်များသည် တစ်ရက်လျှင် သရက်သီး တစ်တန်အထိ ရောင်းချရကြောင်း သိရှိရသည်။

မတ်လကုန်မှစ၍ သရက်သီးရာသီရောက်သည့်အချိန်တွင် စူပါမားကက်များမှ အသီးအနှံများကို ပိုမိုဝယ်ယူကြမည်ဖြစ်ကြောင်း၊ An Giang ပြည်နယ်၊ စက်မှုနှင့်ကုန်သွယ်မှုဌာနမှ ဒုတိယ ညွှန်ကြားရေးမှူး Nguyen Thanh Huan က An Giang ပြည်နယ်အနေဖြင့် ယင်းပြည်နယ်ထွက် သရက်သီးများကို စျေးကွက်သို့ ပိုမိုတင်ပို့ပြီး ပြည်တွင်းစူပါမားကတ်ဆိုင်ခွဲများ အများအပြားသို့ ရောင်းချရန် ကြိုးစားနေကြောင်း ပြောကြားခဲ့သည်။

မကြာသေးမီက ပထမဆုံးအကြိမ်အနေဖြင့် ယင်းပြည်နယ်သည် တောင်ကိုရီးယားသို့ သရက်သီး ၁၃ တန် တင်ပို့ခဲ့ကြောင်း၊ An Giang ပြည်နယ်တွင် သရက်ခြံ ၁၂၀၀၀ ဟက်တာ အပါအဝင် ဥယျာဉ်ခြံမြေ ၁၇၉၀၀ ဟက်တာရှိပြီး Cho Moi ခရိုင်တွင် ဟက်တာ ၆၄၀၀ ရှိကြောင်း သိရှိရသည်။

Source: VnExpress International, 25 March 2024

Source: https://www.doca.gov.mm