ဖိလစ်ပိုင်နိုင်ငံ၌ အစိုးရ၏ ရန်ပုံငွေတိုးမြှင့်သုံးစွဲမှုအရ ယခုနှစ်တွင် ဆန်မက်ထရစ်တန်ချိန် ၁၂.၁၂၅ သန်း ခန့်ထွက်ရှိမည်ဟု ခန့်မှန်းရကြောင်း အမေရိကန်လယ်ယာစိုက်ပျိုးရေးဌာန (USDA) က ပြောကြားခဲ့ပါသည်။
ဖိလစ်ပိုင်၏ ဆန်ထွက်ရှိနိုင်မှုနှင့် စပ်လျဉ်း၍ USDA မှ နောက်ဆုံးခန့်မှန်းချက် ထုတ်ပြန်မှုသည် ၎င်းတို့၏ ယခင်ခန့်မှန်းချက်ဖြစ်သော ဆန်တန်ချိန် ၁၂ သန်းထက် အနည်းငယ် မြင့်မားနေပြီး အယ်လ်နီညို ရာသီဥတုဖြစ်စဉ်သည် ဧပြီလမှ မေလအတွင်း အားပျော့လာမည်ဟု ခန့်မှန်း ချက်ကို ထည့်သွင်းစဉ်းစားထားခြင်းဖြစ်ကြောင်း သိရှိရပါသည်။
ဖိလစ်ပိုင်အစိုးရသည် ရန်ပုံငွေများဖြည့်ဆည်းလျက် ဆန်စပါးကဏ္ဍကို ဦးစားပေးဆောင်ရွက်နေပြီး လယ်သမားများကလည်း ဓာတ်မြေသြဇာနှင့် မျိုးစပ်မျိုးစေ့များကို တိုးမြှင့်အသုံးပြုလာ ကြကြောင်း၊ ဖိလစ်ပိုင်လယ်ယာစိုက်ပျိုးရေးဦးစီးဌာန (DA) ၏ ဆန်စပါးကဏ္ဍဘက်စုံမြှင့်တင်ရေး အစီအစဉ် (Masagana Rice Program) အရ ယခုနှစ်တွင် ရန်ပုံငွေ ပီဆို ၃၀.၈ ဘီလီယံကို ကျခံ သုံးစွဲမည်ဖြစ်ပြီး အကြမ်းဖျင်းအားဖြင့် ၂၀၂၃ ခုနှစ်နှင့် တူညီသော်လည်း ၂၀၂၂ ခုနှစ်တွင်ရရှိသည့် ပီဆို ၁၅.၈ ဘီလီယံ၏ နှစ်ဆရှိကြောင်းနှင့် အဆိုပါအစီအစဉ်သည် လယ်သမား ၂.၃ သန်းကို ကူညီပံ့ပိုးပေးရန် ရည်ရွယ်ဆောင်ရွက်ခြင်းဖြစ်ကြောင်း USDA ၏ အစီရင်ခံစာတွင် ဖော်ပြထားသည်။
ဖိလစ်ပိုင် ဓာတ်မြေသြဇာနှင့် ပိုးသတ်ဆေး အာဏာပိုင်အဖွဲ့၏ အချက်အလက်များကို ကိုးကား၍ ဓာတ်မြေသြဇာ ဈေးနှုန်းများသည် ယခင်နှစ်များကထက် ပိုမိုတည်ငြိမ်နေပြီး ဆန်စပါး စိုက်ပျိုးထုတ်လုပ်နိုင်မှုအဆင့်အပေါ် သက်ရောက်မှုရှိကြောင်း၊ ယခုနှစ် စပါးရိတ်သိမ်းမည့် ဧရိယာသည် ယခင်ကနှင့် တူညီစွာ ဟက်တာ ၄.၈ သန်းခန့်ရှိမည်ဟု ခန့်မှန်းရကြောင်း၊ လူဦးရေတိုးပွားမှု နှင့်အညီ ၂၀၂၄-၂၀၂၅ စျေးကွက်တင်ရောင်းချသည့်နှစ်အတွက် ဆန်စားသုံးမှုသည် မက်ထရစ် တန်ချိန် ၁၉.၆ သန်းအထိ တိုးမြင့်လာနိုင်ကြောင်း၊ ကမ္ဘာ့ဂျုံစျေးနှုန်းများ တည်ငြိမ်နေသော်လည်း ဆန်နှင့်ဂျုံ အဓိကစားသုံးကုန်နှစ်ခု၏ ဈေးနှုန်းများမြင့်တက်လာခြင်းကို ကြုံတွေ့ခဲ့ရသဖြင့် ပြီးခဲ့သည့်နှစ်တွင် ဆန်စားသုံးမှုမှ ဂျုံစားသုံးမှုသို့ သိသာစွာပြောင်းလဲလာမှု မရှိကြောင်းဖြင့်လည်း USDA က ဖော်ပြထားသည်။
ပြည်တွင်းရှိ လယ်ယာမြေများမှ စပါးရိတ်သိမ်းမှု နည်းပါးလာခြင်းကြောင့် ဖိလစ်ပိုင်နိုင်ငံ၏ ဆန်တင်သွင်းမှုသည် မက်ထရစ်တန်ချိန် ၄.၀ သန်းအထိရှိမည်ဟု အစောပိုင်းက ခန့်မှန်းထားကြပြီး ၎င်းခန့်မှန်းချက်သည် USDA ၏ ယခင်ခန့်မှန်းချက် မက်ထရစ်တန်ချိန် ၃.၉ သန်းထက် ပိုမိုမြင့်မားသည်။ သို့ဖြစ်ရာ ဖိလစ်ပိုင်နိုင်ငံသည် ကမ္ဘာ့ထိပ်တန်း ဆန်တင်သွင်းသည့်နိုင်ငံအဖြစ် ဆက်လက်တည်ရှိလျက် ၎င်း၏နောက်၌ အင်ဒိုနီးရှား၊ တရုတ်နှင့် ဥရောပသမဂ္ဂတို့က နီးကပ်စွာ ကျန်ရှိနေမည်ဖြစ်ပါသည်။
ဖိလစ်ပိုင် လယ်ယာစိုက်ပျိုးရေးဦးစီးဌာနရှိ စိုက်ပျိုးရေးလုပ်ငန်းဗျူရိုက ၂၀၂၃ ခုနှစ်တွင် ဆန်တန်ချိန် ၃.၆ သန်း တင်သွင်းခဲ့ပြီး ၂၀၂၂ ခုနှစ်တွင် ဝင်ရောက်ခဲ့သည့် တန်ချိန် ၃.၈၂ သန်း အောက် ၈.၉၆% ကျဆင်းသွားကြောင်း ဖော်ပြခဲ့သည်။ အဆိုပါဌာန၏ အဆိုအရ ဖိလစ်ပိုင်နိုင်ငံအနေဖြင့် တစ်လလျှင် အနည်းဆုံးဆန်မက်ထရစ်တန်ချိန် ၃၃၀၀၀၀ ခန့် တင်သွင်းရန် လိုအပ်မည်ဖြစ်ကြောင်း သိရှိရပါသည်။
Source: Manila Times, 25 Mar 2024
Source: https://www.doca.gov.mm
