အိန္ဒိယနိုင်ငံတွင် ၂၀၂၄-၂၅ ဘဏ္ဍာနှစ်၊ ဧပြီလမှ ဒီဇင်ဘာလအထိကာလအတွင်း သဘာဝရာဘာ၊ လက်ဖက်ခြောက်၊ ကော်ဖီ၊ ဖာလာစေ့ (အသေး) ၏ ဈေးနှုန်းများသည် ယခင်နှစ် ကာလတူက ထက် မြင့်တက်လာကြောင်း အစိုးရတာဝန်ရှိသူများက ပြောကြားခဲ့ ကြောင်း The Hindu Businessline သတင်းဌာနမှ ယခုလ ၁၂ ရက်နေ့က ဖော်ပြသည်။
၂၀၂၄-၂၅ ဘဏ္ဍာနှစ်၊ ဧပြီလမှ ဒီဇင်ဘာလအထိကာလအတွင်း Kerala ပြည်နယ်၊ Kottayam ခရိုင်တွင် RSS 4 ရာဘာမှိုင်းခံပြား၏ ပျှမ်းမျှဈေးနှုန်းမှာ ၁ ကီလိုဂရမ်လျင် ရူပီး ၂၀၂ ဒသမ ၀၄ ဖြစ်ပြီး၊ ယခင်နှစ်ကာလတူက ရူပီး ၁၅၁ ဒသမ ၈၈ သာရှိ၍ ၃၃ ဒသမ ၀၃ ရာခိုင်နှုန်း မြင့်တက် လာကြောင်း သိရသည်။ လက်ဖက်ခြောက်၊ ကော်ဖီ၊ ဖာလာစေ့ (အသေး) ၏ ဈေးနှုန်းများလည်း အလားတူမြင့်တက်ခဲ့ကြောင်း အိန္ဒိယကူးသန်းရောင်းဝယ်ရေးနှင့် စက်မှု ဝန်ကြီးဌာန၊ ဒုတိယဝန်ကြီး Jitin Prasada မှ လွှတ်တော်အစည်းအဝေးတစ်ခုတွင် ပြောကြားခဲ့ကြောင်း သိရသည်။
အဆိုပါကာလအတွင်း Kerala ပြည်နယ်၊ Kochi မြို့တွင် လက်ဖက်ခြောက်၏ ပျှမ်းမျှ လေလံ ဈေးနှုန်းမှာ ၁၈ ဒသမ ၁၇ ရာခိုင်နှုန်းမြင့်တက်ပြီး၊ ဖာလာစေ့ (အသေး) ၏ ပျှမ်းမျှ လေလံ ဈေးနှုန်း မှာ ၄၉ ဒသမ ၄၄ ရာခိုင်နှုန်း မြင့်တက်ခဲ့ကြောင်း သိရသည်။ အလားတူ အခြောက်ခံထားခြင်း မရှိသေးသည့် အာရေဗီကားကော်ဖီသီး၏ ပျှမ်းမျှ (စိုက်ခင်းအရောက်) ဈေးနှုန်း မှာ ၃၂ ဒသမ ၅၄ ရာခိုင်နှုန်းနှင့် ရိုဗက်စတာကော်ဖီသီး၏ ပျှမ်းမျှ (စိုက်ခင်းအရောက်) ဈေးနှုန်း မှာ ၅၅ ဒသမ ၉၉ ရာခိုင်နှုန်းခန့် မြင့်တက်ခဲ့ကြောင်း ၎င်းမှ ပြောကြားခဲ့သည်။
အိန္ဒိယနိုင်ငံသည် နနွင်းကို အများဆုံး ထုတ်လုပ်တင်ပို့လျက်ရှိသည့် နိုင်ငံတစ်ခုဖြစ်ပြီး၊ ၂၀၂၃-၂၄ ဘဏ္ဍာနှစ်တွင် နနွင်းတန်ချိန် ၁ ဒသမ ၆၂ သိန်း၊ တန်ဖိုး ကန်ဒေါ်လာ ၂၂၆ ဒသမ ၅၈ သန်း တင်ပို့ ရောင်းချခဲ့ကာ ကမ္ဘာ့ နနွင်းတင်ပို့မှု၏ ၆၅ ရာခိုင်နှုန်းခန့်ရှိကြောင်း ဒုတိယဝန်ကြီးမှ ပြောကြားခဲ့ သည်။ အိန္ဒိယမှ တင်ပို့လိုက်သည့် နနွင်းအားလုံး၏ ၉၉ ဒသမ ၉၅ ရာခိုင်နှုန်းကို လက်ခံခွင့်ပြုပြီး၊ ၀ ဒသမ ၀၅ ရာခိုင်နှုန်းခန့်သာ ငြင်းပယ်ခံရတာမျိုးရှိ ကြောင်း ၎င်းမှ ဆက်လက် ပြောကြားခဲ့သည်။
အိန္ဒိယနိုင်ငံတွင် ၂၀၂၃-၂၄ ဘဏ္ဍာနှစ်က နနွင်းကို ဟက်တာ ၂ ဒသမ ၉၃ သိန်း စိုက်ပျိုး ခဲ့ပြီး၊ တန်ချိန် ၁၀ ဒသမ ၉၃ သိန်းကျော် ထွက်ရှိခဲ့ကြောင်း သိရသည်။ ၂၀၂၄-၂၅ ဘဏ္ဍာနှစ်၊ ဧပြီလမှ ဒီဇင်ဘာလအထိကာလအတွင်း Tamil Nadu ပြည်နယ် Erode ခရိုင်နှင့် Telangana ပြည်နယ် Nizamabad ခရိုင်တို့ရှိ အဓိကဈေးကွက်များတွင် နနွင်း ဈေးနှုန်းမှာ ၁ ကီလိုဂရမ် လျင် ရူပီး ၁၃၆ ဒသမ ၁၉ နှင့် ရူပီး ၁၂၁ ဒသမ ၃၄ အသီးသီးရှိကြောင်း သိရသည်။ ယခင်နှစ်ကာလတူက နနွင်း ဈေးနှုန်းမှာ ၁ ကီလိုဂရမ်လျင် ရူပီး ၈၃ ဒသမ ၆၀ နှင့် ရူပီး ၈၈ ဒသမ ၄၄ အသီးသီးရှိ၍ Erode ဈေး ကွက်တွင် ၆၂ ဒသမ ၉ ရာခိုင်နှုန်းနှင့် Nizamabad ဈေးကွက်တွင် ၃၇ ဒသမ ၂ ရာခိုင်နှုန်း အသီးသီးမြင့်တက်ခဲ့ကြောင်း သိရသည်။
အဆိုပါ လွှတ်တော်အစည်းအဝေးတွင် သဘာဝရော်ဘာတင်သွင်းမှုအပေါ် စုပုံရှင်း ရောင်းချမှု ကာကွယ်သည့်အခွန် (Anti-dumping duty) လတ်တလော ကောက်ခံခြင်း မရှိသည့် အခြေအနေ၊ ကြက်သွန်နီတောင်သူများအတွက် အစိုးရမှ ကူညီထောက်ပံ့မည့် အစီအစဉ်နှင့် ပင်လယ်ရေညှိ (Seaweed) ထုတ်လုပ်မှုအခြေအနေများနှင့် စပ်လျဉ်းသည့် မေးမြန်းချက်များကို သက်ဆိုင်ရာ တာဝန်ရှိသူများ ပြန်လည်ဖြေကြားပေးခဲ့ကြောင်း သိရ သည်။
Source: The Hindu Businessline, Govt: Rubber, tea, coffee, cardamom prices up in Apr-Dec 2024-25, February 12, 2025.
စီးပွားရေးသံမှူး၊ ကော်လ်ကတ္တားမြို့။
